کوچنيان زموږ راتلونکي دې

د هسکو د ټولنی د مشر پیغام !

ګرانوهیوادوالواودوستانو!

تر ټولو د مخه تاسو ته د هسکو دټولنی د ویب پاڼی دلیدو پخاطر هرکله راشی او کورودانی وایم.                     

څرنګه چه تاسو ته څرګنده ده په افغانستان کی د قریب دریو لسیزو جنګونو او بربادیو یوه  نتیجه هم د ښوونی او روزنی د حق نه د دی هیواد د یو زیاد شمیر ماشومانو او تنکیو ځوانانو محرومیدل دي که څه هم په دی ورستیو اوو کلونو کی د بین المللی ټولنی او د ښوونی او روزنی د چارواکو د ګډو هلوځلو په نتیجه کی زیاد شمیر نجنو او هلکانو ته د لیک لوست زمینه برابره شوی مګر د ټولو لاسته راوړنو سره سره اوس هم په زرګونه  افغان ماشومان په تیره بیا د افغانستان په جنوب او ختیځو ولایاتو کی دښوونځی او ښوونی او روزنی د طبعی حق نه بی برخی دي

په افغانستان کی د ښوونی او روزنی د پرمختګ په لاره کی  د ښوونکو کمبود او د ښوونځیو نښتوالی یوازنی ستونزه نده ،بیوزلی او د اکثروکورنیو په تیره بیا هغه کورني چه پدی ورستیو وختو کی د ایران او پاکستان  له  هیوادونو نه بیرته  راستانه شوي ناوړه اقتصادي حالت بل هغه عمده عامل او لوی خنډ دی چه یو زیات شمیر کوچنیان یی د خپل طبیعی حق د تر لاسته کولو نه بی برخی ساتلي دي.

د راپورونو له مخی ځینی  بی وزلی کورني  خو حتی خپل ماشومان روزنتونونو کی شامل  کړي ځکه  پخپله د خپلو ماشومانو د اعاشی ا و د ښوونځی د مصارفو د برابرولو و س نلري،همدارنګه د ماشومانو کار او کورني ته د ژوند د اړتیاو برابرول بل هغه لویه ستونزه ده چه په زرګونه ماشومان یی د ښوونځی نه بهر ساتلي دي، د کابل ا و د افغانستان په نورو لویو ښارونو کی هره ورځ یو زیاد شمیر کوچنیان په سختو کارونو یا سوالګری  لګیا  دي تر څوخپلو کورنیو ته  ډوډي او د ژوندنور ضروریات  برابر کړۍ

ګرانوهیواد والو !

دا ماشومان زموږ انساني مرستواو لاس نیولو ته اړتیا لري،ماشومان د هری ټولنی راتلونکي دي که نن موږ  دی  بیوزلو ماشومانو ته د ښوونی او روزنی زمینه  برابرنکړو څرنګه به دا ماشومان  سبا د دی جوګه شی  چه د خپل هیواد په بیا ودانولو او رغاونی کی په مطلوب ډول برخه واخلی ،راځی چه دی ماشومانو سره په مرستی  سره خپل ملی اواسلامی دین ادا کړو .

د هیواد بیوزلو ماشومانوسره مرسته په حقیقت کی دهیواد راتلونکی سره مرسته ده .

                                                         و من الله توفیق            

                                      حفیظ الله خالد             

د هسکو د ټولنی مشر