د سولی د ورځې په ویاړ  چاپ شوى کتاب

زموږ جنګ ځپلې  ټولنه په اوسنيو شرایطو کی نه یواځې اقتصادی بیاراغونې ته ضرورت لري  بلکه  د خلکو روحي او ذهني راغونی ته هم د ټولو نه زیاد اړتیا ده ، له بده مرغه  دری لسیزو جګړو زموږ د هیواد د اقتصادي بنسټونو د ویجاړولو  تر څنګ زموږ د خلکو پر ذهنونو او کړووړو باندی هم  ډیره منفی اغیزه کړې  او زموږ په ټولنې کی یی د سوله ایز ژوند، زغم  ،ورورګلوۍ  او د یو بل سره د اړتیا په وخت کی د مرستې  او لاس نیوی  روحیه چی زموږ د ویاړلي کلتور او دود اودستور یوه برخه وه   ډیره کمزوری کړې ده .
د هیواد اقتصادي راغونې لپاره بهرنۍ مرستی هم پکاریدلی شي خو د ټولنی ذهني راغونه  بیا یوازی د افغانانو کار دې پدی لاری کی هیڅ  کوم بهرنۍ هیواد زموږ مرسته  نشي کولې د ا د هیواد د هر شاعر لیکوال ژورنالیست او د ټولنې د ړوند آندي ملی او اسلامی دنده ده چی  دا ملي  ارزښتونه  بیرته راژوندی کړي او په  هیوادکی دسولی او امنیت دراتلو پخاطر خپل ټول قوت پکار واچوي  پری نیږدي  زموږ دا  ویجاړ  وطن نور هم د جنګ په سرو لمبو کی وسوزي او د هری ورځې په تیریدو سره د کونډو رنډو او یتیمانو په شمیر کی نور هم زیاتۍ راشي.

د سولی پیغام کتاب زموږ  د جنګ نه راوتلی رنځوری  ټولنی کی د سولی او ورورګلوي د پیغام د خپرولو په
موخه د سپتامبر د ۲۱ می  د سولی د بین المللي ورځی په ویاړ خپره  سوې ده، پدی کتاب کی د حفیظ الله خالد یو شمیر پښتو او دری شعرونه او لیکنۍ چې  وطن کی د سولی، پخلاینۍ او روغې جوړې  د ضرورت په اړه دي  راټول سوي  دي ، دا کتاب په ۹۰ مخونو کی د دانش د خپرندوی ټولنې لخوا  په ډیر  ښه  صحافت له چاپه راوتیلی ده ،  څرنګه چی لیکوال د کتاب په سریزی کی هم ورته  اشاره کړې د کتاب اکثر لیکنې  د هیواد دپیښو په مقابل کی د لیکوال  غبرګون او د زړه آواز ده. د بیلګی په توګه کله چی هغه اوري دهیوا  د ښوونځي  چې  د وطن راتلونکی نسل د ښوونی او روزنی ځای دی په بیرحمۍ سره  سوزول کیږي اویا خبریږي  چی د بلیونونو ډالرو بهرني مرستو او بین المللی ټولنې  په موجویت  کی د هیواد په ځینو سیمو کی  زموږ هیواد وال د بیوزلۍ او نیستي نه  د وچی ډوډۍ د اخستلو وس نلري او دی ته مجبوریږي چی د ډوډۍ پرځای واښه وخوري  خالد لکه خپلو نوروهیوادوالو  د خپل وطن  پدی  ناوړه حالت ځوریږي او د وطن حال تر عنوان لاندی  خپل غبرګون د داسې زړه بوګنونکو  پیښو په  مقابل کی  د نظم په ژبه داسی بیانوي  :

هرښوونځې چی په وطن کې نن سوځیږي
زړه می اور واخـــلي هـــډونه می ویلیږي
چې د ولږې نه انسـان هلته واښه خــوري
څنــګه ستوني نـه بـه زمــا ډوډي تیریږي    ....

همدا رنګه   حفیظ  خالد د هیواد په ځینو نورو تراژیدی پیښو چی په لسګونه کورنی یی د غم په تغر کینولي  د نظمي لیکنو له لاری خپل  اعتراض پورته کوي  او د جنګ د ټولو ښکیلو غاړو نه  غواړي چی نور دی زموږ  دی سوزیدلي بڼ ته اور نه اچوي..

 د کتاب مینه وال کولی شي  د سولی پیغام  له لاندنیو پتو  ترلاسه کړي :

 په کابل کی د  دانش کتاب پلورنځی ، پخته پلورۍ کوڅه ، جا ده څلور لاری

د  ویانا په ښار کی  د آریانا پلورنځي  د ویانا د ښار شپاړسمه ناحیه

په نورو هیوادونو کی زموږ ګران هیوادوال کولی سی د کتاب د لاسته راوړلو لپاره د هسکو بشري ټولنی سره په تماس کی شي د کتاب د پیرودلو عاید به د هسکو د خیر ښیګڼی د ټولنی له لاری افغان بی پلاره او بیوزلو ماشومانو سره د مرستی په لار ه کی  وکارول شي .

پدی ورستیو وختو کی زموږ په ګران  هیواد کی  د علم او پوهۍ دښمنا نو یو ځل بیا زموږ د وطن  کوچنی ماشومان او د ښوونځی معصوم شاګردان   په کیمیاوي غازو مسموم  چی په نتیجه کی د کاپیسا ولایت د محمود عراقي د نجونو د ښوونځي ۹۸ تنه  زده کونکي  روغتون کی بستري کړای شول.

 په ورستیو میاشتو کی دا دریم ځل دی چی  د نجونو ښوونځي د دولت د مخالیفینو د کیمیاوي  حملو هدف ګرزي ، دوه میاشتی مخکی  د پروان  ولایت  د  مرکز  د چاریکارو د نجونو په ښونځي کی شپیته تنه  معصوم  نجونی د ورته عمل له امله روغتون ته بیول شوي وو، همدا رنګه په تیر نوامبر کی په موټر سایکل سپرو افرادو د قندهار د ښار تر څیرمه  د میرویس نیکه د  نجونو د ښوونځۍ په یوی ډلې شاګردانو او  ښوونکو باندې  هغه مهال تیزاب وشیندل چی له ښونځي نه د خپلو کورونو خواته روان وو ، د  راپورونو له مخی پدې ناځوانمردانه  برید کی   زیاد شمیر نجو نوته د پوټکي زیان  رسیدلی تر دی حده  چی  یوه زده کونکۍ د  معالجی او درمل  لپاره د هیواد نه  بهر ته ولیږل شوه.

ددی حادثی نه وروسته یو شمیر کورنئ  ښوونځي  ته د خپلو ماشومانو  د لیږولو نه ډده وکړ خو وروسته دا کورنۍ پریکړه وکړ چې خپل ماشومان  بیا ښوونځي ته ولیږي  او د علم  او پوهی دښمنانو ګواښونو  ته تسلیم نشي.

په تیرو دریو کلنو کی د هیواد سویل  او ختیځو ولایتونو کی په لسګونه ښوونځي د  علم او پوهې د دښمنانو لخوا سوزول شوي او یا د امنیت د نشتوالي له امله تړل شوي دي له بده مرغه  ددی حالت په نتیجه کی زموږ د هیواد په زرګونه تنکي ماشومان   او نوی  پښت  د ښوونی او روزنی د  طبیعي حق نه بی برخی پاتې دي ٬ پر سیره پردی  په  ځنیو برخو کی د ښوونځي زده کونکي ، ښوونکی او د معارف کارکونکي  د دولت د مخالیفینو لخوا ویرول شوي او  حتی بی له کومه جرمه په شهادت رسیدلي دي.

داسی  ښکاري  چی  دا ټول هلی ځلې  یوازی د یوه  کرغیړن هدف  لپاره تر سره کیږي او  هغه  د ښوونې او روزنې نه  د افغانستان   د بیګناهو  ماشومانو  او تنکیو ځوانانو  بی برخی کول او په یویشتمی پیړې کی  هغوي جهل او ناپوهۍ کی ساتل دي.

د هسکو ټولنه چی مخه یی د افغانستان   د ښوونځيو  د بی وزلو  ماشومانو سره  مرسته او هیواد کی د ښوونی او روزنی پرمختګ دی د کاپیسا ولایت  پر بیګناه زده کونکو نجونو باندی د  کیمیاوی غازونو استعمال  یو غیر اسلامی او  د بشري ضد عمل بولی او په کلکه یی غندي ،موږ  دولتی چارواکو او  ټولو معززوقومي مشرانو نه هیله  لروچی د داسی ورته زړه بوږنونکو پیښو د تکرار پخاطر دی له هیڅ راز هلو ځلو څخه  ډډه ونکړي.

ماشومان  زموږ  د هیواد راتلونکی دي هغوي ته د ښوونې او روزنی  دزمینې برابرول او د بیوزلو د ښوونځي  شاګردانو سره مرسته  د هر بااحساس هیوادوال ملی او اسلامي دنده  ده.

د هسکو ټولنه